Gihisgutan ang pagpalapad sa abaca production sa 3rd District sa Zamboanga del Norte pinaagi sa agresibong pagpadaghan ug pag-apod-apod sa abaca planting materials ngadto sa mga lungsod nga angayan alang sa abaca farming.
Gipahigayon ang diskusyon atol sa miting ni Cong. Ian Amatong uban nila Philippine Fiber Industry Development Authority (PhilFIDA) Regional Director Keven Badon ug Zamboanga del Norte Provincial Director Angelita Lanzado sa iyang opisina sa Ganase, Liloy.
Lakip sa mga plano ang paghatag og dugang nga abaca planting materials aron mapalapdan ang mga tanoman ug madugangan ang produksiyon sa mga lugar nga adunay potensyal alang sa maong industriya.
Gihisgutan usab ang proposed acquisition sa post-harvest facilities ug equipment alang sa mga farmer associations aron mapauswag ang productivity ug madugangan ang livelihood opportunities sa mga lokal nga mag-uuma.
Gilauman nga ang pagpalig-on sa abaca production, inubanan sa tukmang kagamitan ug suporta, makatabang sa pagpauswag sa kita ug panginabuhian sa mga farming communities sa 3rd District.
Nagpadayon usab ang koordinasyon tali sa congressional office ug PhilFIDA alang sa pagpatuman sa dugang nga mga programa ug suporta para sa mga mag-uuma sa distrito.(IKEN B. GULLEM)
Source: Team Adrian Amatong