Gipakita sa mga Micro Small and Medium Enterprises (MSMEs) gikan sa Zamboanga Peninsula, lakip ang mga negosyo nga gitabangan sa Zamboanga del Norte, ang ilang lokal nga mga produkto sa Sabah International Expo 2026 (SIE2026) nga giablihan niadtong Septiyembre 4 sa Kota Kinabalu, Sabah, Malaysia.
Partikular nga gipasiugda sa mga participating Coconut Farmers and Industry Development Plan (CFIDP)-assisted MSMEs ang nagkalain-laing coconut-based products, nga nagpakita sa potensyal sa coconut industry sa Zamboanga Peninsula alang sa mas lapad nga merkado.
Apil sa delegasyon sa DTI Region IX si Benjie Elopre, CFIDP Focal Person sa DTI–Zamboanga del Norte, kauban nila Regional Director Engr. Al-Zamir I. Lipae ug Trade Promotion Officer Ar-Chadee A. Bahjin.
Gisuroy sa delegasyon ang exhibition area ug mga booth sa participating MSMEs aron masuta ang mga produkto ug mga oportunidad alang sa market expansion, business linkages ug posibleng partnerships uban sa mga exhibitors ug international stakeholders.
Ang pag-apil sa mga MSMEs gikan sa Zamboanga Peninsula sa SIE2026 naghatag kanila og higayon nga mapalapad ang exposure sa ilang mga produkto, ilabi na ang mga produkto nga nakabase sa lubi, ngadto sa mga potensyal nga buyers ug business partners sa international market.
Alang sa Zamboanga del Norte ug sa tibuok Zamboanga Peninsula, ang maong partisipasyon nagpakita sa padayong paningkamot nga mapalambo ang coconut industry, mapalig-on ang mga MSMEs ug mahatagan sila og mas daghang oportunidad nga makasulod sa bag-ong mga merkado.(IKEN B. GULLEM)
Source: DTI R9