Malampusong gipahigayon ang Mother Class 2021 sa Barangay San Antonio, lungsod sa Polanco kaniadtong miaging adlaw. Gisugdan kini sa hamubo nga program nga gidumala sa Polanco Health Unit pinanguluhan ni Dr. Patrisha Quema nga mahatagan og igong kasayuran ang mga nag sabak o buros kun unsa ang angay buhaton sud sa siyam ka bulan niining pag mabdos.
Nasayran gikan ni Dr. Quema nga ang mother class mao ang pag promote sa kahimsog sa maayong panglawas sa mga babayeng mabdos ug mga inahan nga bag-o pa lamang nanganak aron mahatagan sila sa tukma nga kasayuran may kalabot na sa maternal health, immunization program, family planning, katungod sa kabataan ug mga responsibilities, blood program ug covid-19 vaccination.
Gipasalamatan ni Dr. Quema ang barangay council sa San Antonio sa hugtanong suporta sa maong programa ug ingon man si konsehal sa lungsod Jennifer Rodrigo diin maoy chair sa committee on health nga nanghatag og mga regalo sa mga mabdos.
Samtang sa mensahe nga gipadayag ni konsehal Rodrigo iyang gipaabot ang ka importante sa usa ka inahan sa kinabuhi sa mga anak ug pamilya. Ang inahan maoy mag amoma sa bata samtang anaa pa kini sa iyang sabakan hangtud pag dako niini. Dugang gipaabot ni konsehal Rodrigo nga sila isip mga alagad sa lungsod, maoy instrumento alang sa pag kab-ot sa maayong panglawas.
Samtang sa laing bahin, gipahayag usab ni Dr. Pat Quema ang kabahin sa ipahigayon nga mass blood donation drive nga himoon sa lungsod sa Polanco karong umalabot December 6 ug 7. Ang pag donate og dugo maka luwas og kinabuhi sa tawo.
(Photos courtesy by Jennifer Rodrigo Facebook account)