Cebu City – Gihikay na ang pyansa alang sa temporaryong kagawasan ni Cebu City Councilor candidate, kanhi Cebu City Councilor ug radio commentator Pastor “Jun” Alcover sa iyang 2 counts sa kasong cyberlibel.
Gi-proseso ni Alcover ang iyang bail, Biyernes Marso 4, 2022, human kini malutsi ug warrant of arrest ug gisikop sa Criminal Investigation and Detection Group (CIDG), Hwebes sa gabii, Marso 3, 2022.
Nadakpan si Alcover sa ilang panimalay sa Veterans Drive, Barangay Lahug, Syudad sa Sugbo.
Sa warrant ug arrest nga gi serve sa kapolisan walay naka butang kung si kinsa nga personalidad ang nag file sa maong kaso.
Kasong kalapasan sa RA 10175 o Cybercrime Prevention Act of 2012 ang gipasaka batok sa kanhi konsehal.
Ang warrant gi issue ni Judge Ramon Bueno Daomilas Jr. sa Branch 11, kinsa mi rekomenda ug tag ₱ 10,000 matag counts sa kaso.
Ang kanhi konsehal membro sa partido sa city administration, Partido Barug-PDP Laban, ubos sa leadership ni Mayor Michael Rama.
Gipasalig ni Rama nga mo assist ni Alcover ang partido sa gihulagway nga “possibly political” case.
(News & photo courtesy of Criminal Investigation and Detection Group-7)
