Gipatuman pagbalik ang skeletal workforce scheduling alang sa mga kawani sa Panggamhanang Probinsyal sa Misamis Oriental.
Kamandoan kini ni Gobernador Bambi Emano isip lakang sa pagsugpo sa Covid-19 hilabina gideklarar nga anaa na sa Alert Level 3 ang Misamis Oriental ug ang siyudad sa Cagayan de Oro.
Pinaagi sa Memorandum Order GYVBE No.2022-012 nga gipagawas niadtong miaging semana nga gipalig-on  pinaagi sa pag-amendar niini ubos sa Memorandum Order GYVBE No.2022-017, giimplementar sa panggamhanan ang skeletal workforce scheduling sa tanang buhatan sa kapitolyo probinsyal.
Kini nagmando nga tanang buhatan sa kapitolyo kinahanglan nga i-grupo og kaduha.
Ang unang grupo motungha sa trabaho buntag gikan sa alas 8:00am-12:00nn ug ang isa ka grupo motungha sa hapon gikan alas 12:00 sa udto paingon sa alas 5:00 sa hapon ayha paghuman ug disinfect sa unang grupo.
Ang tanang pangulo sa departamento motungha sa buntag ug naa kanila usab kon magpabilin ba sila sa opisina taman sa hapon.
Lakip sa nakalatid sa memorandum nga ang mga frontline offices sama sa Provincial Health Office (PHO), walo ka Misamis Oriental Provincial Hospitals, Provincial Disaster Risk Reduction and Management Office (PDRRMO), Provincial Accounting Office, BAC Office, Provincial Agriculture Office (Admin Division), Provincial Veterinary Office, Provincial Engineering Office, Capitol Park Office, Provincial Security Guards ug Misamis Oriental Provincial Jail magpabilin 100% capacity o normal ang iskedyul sa pagtungha.
Aduna sab pila ka buhatan nga nalakip niini nga gikinahanglan nga alerto ug nakaduty.
Gimanduan usab pinaagi sa memorandum ang tanang pangulo sa mga departamento nga i-report ang mga empleyado nga nakasinati og Influenza-Like Illness (ILI) ug abisohan nga mobisita ug magpakonsulta sa doktor sa Kapitolyo nga si Dr. Jocelyn Biña sa dili pa motungha balik sa opisina.
Kini nga lakang gihimo sa panggamhanang probinsyal aron sa pagminus sa pagtapok sa mga opisina. Ang hisgutanan sa maayong panglawas hugot nga gitutukan sa administrasyon ni Gobernador Bambi aron ang katawhan sa probinsya masiguro nga layo sa mga sakit dala sa pandemya ug magpabiling himsog ang panglawas.
(Source: Office of the Governor | Misamis Oriental Provincial Information Office Facebook page)
