Gilunsad ning bag-ohay lang ang pag-abli o pagbukas sa mga hulagway sa mga karaang panimalay ug bag-ong lugar sa lungsod sa Balingasag nga kuha kaniadto ug karon alang sa pagpakusog ug pag-promotar sa turismo sa munisipyo.
Kahinumduman nga mahinungdanon ang nahimong kontribusyon sa turismo sa matag Munisipyo sa probinsya sa Misamis Oriental tungod kini naghatag og bili ug importansya sa mga paningkamot sa matag tourism officers ug mga lumilihok aron nga mapasigarbo ang ilang lugar.
Ang Balingasag, nahimutang sa tunga-tunga nga parte sa mapa sa probinsya ug anaa sa este nga bahin sa Misamis Oriental ang dili malalis nga gihatagan og gasa sa natural nga turismo ug abunda nga cultural heritage nga adunay potensyal nga makahatag og oportunidad sa panginabuhian sa mga lumulupyo sa nasangpit nga lungsod.
Apan gumikan sa pagbuto sa pandemya, labing naapektuhan ang mga aktibidades sa turismo ug aron sa pagbuhi niini, mipahigayon og inisyatiba ang Municipal Tourism office sa Balingasag aron sa pag-promotar sa mga historical landmarks, mga karaang balay, ug mga potensyal nga mga tourist destinations.
Ang highlight sa maong kalihokan mao ang pagpadayag sa lain-laing mga talan-awon sa turismo sa lungsod sa Balingasag pinaagi sa pagbutyag o pag-unveil sa mga hulagway o photo exhibit sulod sa People’s Palace nga gisugdan adlaw nga Miyerkules, Nobiyembre 24, 2021 nga gitawag nga , HULAGWAY SA BALI – “Kagahapon ug Karon”.
Anaa sa maong kalihokan ang mga dinapit nga bisita sama nila Provincial Tourism Officer Atty. Jeffrey Saclot, Association of Municipal Tourism Officer (ATOM) President Mr. Geronimo Magua Z. Lagbas.
Nanguna usab sa kalihokan si Balingasag Mayor Alexis S. Quina. Anaa usab ang presensya sa 30 ka mga kapitanes sa lungsod, lakip na si Vice Mayor Felix Borromeo, ug mga Sanggunian Bayan Members.
Ang nasangpit nga aktibidades usa ka inisyatiba sa Municipal Tourism Office pinaagi ni Ms. Cecille Abao Galdo uban sa Municipal Tourism Council pinaagi nila Ms. Verna Valmores Cua ang Municipal Tourism Council – Chairman.
Tumong ug tinguha sa Municipal Tourism Office ug sa maong kalihokan nga mapromotar ang lokal nga turismo, mga produkto ug mga espesyal nga mga pagkaon sa Balingasag ug aron dasigon ang mga turista sa pagbisita.
Gumikan usab sa dakong suporta ug pagpahingusog ni Governor Bambi Emano sa natad sa Turismo, dako na ang tabang ug nahimong kabag-ohan niini sa lalawigan tungod nakahatag kini og panginabuhian sa mga katawhan, hilabina nga daghan nga mga kinabuhi ang nabag-o gumikan sa dakong kalamboan sa turismo.
(Source: Balingasag Tourism Office)