Nagpalig-on sa ilang kahibalo ug kapasidad sa pagresponde sa posibleng tsunami ang mga personahe sa Zamboanga del Norte Police Provincial Office (ZNPPO) pinaagi sa Tsunami Awareness and Rescue Operations with Simulation Exercise (SIMEX) niadtong Hulyo 28, 2026, sa Camp Lt. Deogracias G. Hamac, Barangay Sicayab, Dipolog City.
Gipahigayon ang kalihokan aron mahatagan og dugang kahibalo ang mga personahe sa mga angay buhaton panahon sa tsunami ug aron masulayan ang ilang kahandam sa pagpatuman sa rescue ug disaster response operations.
Kabahin ang kalihokan sa pagsaulog sa 31st Police Community Relations (PCR) Month nga adunay tema nga “Sa Bagong Pilipinas, Ugnayang Pulis at Mamamayan: Tapat, Maaasahan, at Nararamdaman ng Bayan.”
Si Provincial Disaster Risk Reduction and Management Office (PDRRMO) Chief Atty. Arvin L. Bonbon, nga Guest of Honor and Speaker, mipasiugda sa kamahinungdanon sa kooperasyon tali sa kapolisan, lokal nga panggamhanan, ug komunidad sa pag-atubang sa mga kalamidad.
Matod ni Bonbon, adunay mas lapad nga papel ang kapolisan gawas sa pagmintinar sa kalinaw ug kahusay, lakip ang pagpanalipod sa kinabuhi, pagtabang sa disaster response ug rescue operations, ug paggiya sa mga residente panahon sa evacuation.
Mitambong sa maong kalihokan si ZNPPO Provincial Director PCol Reydante E. Ariza, uban ang ubang mga opisyal ug personahe sa kapolisan, mga barangay tanod, residente sa Barangay Sicayab, ug mga sakop sa media.
Nag-lecture si Engr. Florenette B. Garcia, Science Research Specialist I ug OIC sa PHIVOLCS Dipolog City, bahin sa “Earthquakes and Tsunamis: Ensuring Safety Through Hazard Awareness and Preparedness.”
Gihisgutan usab ni Mr. Norman Alegarbes ang Provincial Disaster Risk Reduction and Management System, samtang gipatin-aw ni Mr. Ariel T. Espiloa ang Tsunami Drill Management ug ni Mr. Joshua Earl S. Jaictin ang Rescue Operations.
Gitapos ang kalihokan pinaagi sa Simulation Exercise nga nagtumong sa pagsulay sa kahandam ug koordinasyon sa mga partisipante sa pagresponde sa posibleng tsunami ug uban pang emerhensya.(IKEN B. GULLEM)
Source: Zamboanga del Norte Provincial News Network