Malampusong nakapasar ang Police Regional Office 7 (PRO 7) sa Institutionalization Evaluation Process (IEP) Performance Governance Reporting Revalida nga gihimo kagahapon Hulyo 28, 2026.
Ubos sa pagpanguna ni PBGEN Arnold E. Abad, gipakita sa PRO 7 ang ilang mga programa, maayong pamaagi sa pagdumala, ug mga reporma nga gipatuman aron mapalig-on ang serbisyo sa kapulisan ug organisasyon.
Ang revalida gihimo sa Center for Police Strategy Management (CPSM) sa Camp Crame sa Quezon City, diin gi-evaluate sa usa ka panel sa mga opisyal sa PNP ug mga representante gikan sa pribadong sektor ang nahimo sa PRO 7.
Sa iyang presentasyon, gipasiugda ni PBGEN Abad ang mga inisyatiba sa PRO 7, lakip ang mga napamatud-ang kalampusan, mga reporma sa organisasyon, ug padayon nga pagsunod sa PNP P.A.T.R.O.L. Plan 2030.
Human sa presentasyon ug question-and-answer session, gipahibalo ni PMGEN Wilson Joseph F. Lopez, chairperson sa Board of Panel, nga nakapasar ang PRO 7 sa Performance Governance Reporting Revalida.
Sumala sa PRO 7, ang maong kalampusan nagpasabot nga andam na ang regional office alang sa paghatag niini sa Institutionalized Status ubos sa Performance Governance System.
Matud pa sa PRO 7, usa kini ka dakong lakang sa ilang padayon nga paningkamot sa pagpalig-on sa maayong pagdumala, pagpaayo sa performance sa organisasyon, ug paghatag og mas episyente ug mas maayong serbisyo sa katawhan.
I via Renante Socia Lada