Mokabat sa 2,225 ka panimalay sa tulo ka lungsod sa Zamboanga del Norte ang nakadawat og 10 kilos nga rice assistance matag usa pinaagi sa LGSF-FALGU Rice Project niadtong Hulyo 27, 2026.
Nakabenepisyo sa maong programa ang 940 ka panimalay sa Polanco, 535 ka panimalay sa Piñan, ug 750 ka panimalay sa Sergio Osmeña, nga gitumong sa paghatag og dugang nga suporta sa mga pamilya taliwala sa nagkataas nga presyo sa mga panginahanglanon.
Sa Polanco, gipanghatag ang rice assistance ngadto sa 940 ka benepisyaryong panimalay gikan sa 28 ka barangay didto sa Polanco Municipal Gymnasium. Sa Piñan, 535 ka panimalay gikan sa 22 ka barangay ang nakadawat sa ilang ayuda sa Evacuation Center sa Poblacion.
Samtang, 750 ka panimalay sa Sergio Osmeña ang nakabenepisyo pinaagi sa duha ka distribution sites nga nahimutang sa Barangay Biayon ug Barangay Poblacion Bajo aron mas mapaduol ang serbisyo sa mga residente.
Ang LGSF-FALGU Rice Project usa ka programa sa National Government ubos sa administrasyon ni President Ferdinand “Bongbong” R. Marcos Jr., nga gipatuman uban sa suporta sa Provincial Government of Zamboanga del Norte ubos sa liderato ni Governor Darel Dexter T. Uy.
Gipadayag usab sa pipila ka benepisyaryo ang ilang pagpasalamat sa nadawat nga rice assistance, nga ilang giila nga dakong tabang sa ilang mga pamilya ilabina sa pag-atubang sa nagkataas nga presyo sa mga palaliton ug adlaw-adlaw nga panginahanglanon.
Kabahin ang maong distribusyon sa padayon nga paningkamot sa National Government, Provincial Government of Zamboanga del Norte, ug mga lokal nga panggamhanan sa paghatag og konkretong suporta ug ayuda ngadto sa mga pamilyang nanginahanglan.(IKEN B. GULLEM)
Source: Zamboanga del Norte Provincial News Network