Wala nay lugway kon extension sa deadline sa business permit renewal karong umaabot Pebrero 28 ning tuig, sumala pa sa pahibalo ni Jason Adaza, hepe sa Business Permits and Licensing Division sa City Mayor’s Office.
Dugang pa ni Adaza nga kutob alas-8:00 sa gabii karong Pebrero 28 ang renewal sa business permit diha sa may Business One-Stop Shop kon BOSS sa city hall, ug abri usab matag adlaw ang satellite business registration center diha sa SM Downtown Premier hangtud ala-5:00 sa hapon.
Modawat usab sa renewal ug new applications ang BOSS sa city hall ug satellite business registration center sa SM Downtown Premier bisan karong weekend o adlaw’ng Sabado ug Domingo.
Kahinumduman nga gi-extend ang deadline sa business permit renewal gikan Enero 20 ngadto na sa Pebrero 28 nunot sa hangyo sa mga negosyante sa syudad tungod sa epekto sa pandemya.
Nagpasidaan si Adaza nga mag-atubang na og multa ang mga negosyante nga mapakyas pag-renew  sa ilang business permit ini’g lapas sa extended deadline.
(Source: City Finance Department | Cagayan de Oro City Philippines Facebook page)
