Nanawagan ang City Local Environment and Natural Resources Office kon CLENRO sa katawhan ilabina sa mga politiko ug ilang mga lumilihok sa pagsubay kanunay sa designated poster areas sanglit sugdan na sa ilang buhatan ang pagpanangtang sa mga election campaign materials nga gitaod o gipilit sa mga kahoy.
Matud ni Engr Armen Cuenca, hepe sa CLENRO, nga posibleng mag-atubang og silot subay sa balaod ang mga makalapas niini.
Nalatid sa Section 9 sa Republic Act 9006 o Fair Election Act of 2001 nga kinahanglang sundon ang common posting areas nga gitugot sa mga local government units sama sa plaza, merkado, barangay centers ug susamang mga lugar.
Ang Section 21(B) sa Comelec Resolution 10730 nagkanayon nga “in no instance shall an election officer designate as common poster areas any trees, plants, shrubs in any public grounds ug mahimong masilotan og pagkabilanggo ug multa ang masapon nga mamutol o modaot sa mga kahoy.
Subay niini, naghangyo si Engr Cuenca sa mga kandidato ug lumilihok niini nga dili ibutang sa mga kahoy ang ilang mga campaign poster materials.
(Source: CLENRO | Cagayan de Oro City Philippines Facebook page)
