Aron madugangan ang proteksyon batok COVID-19, ang pagbakuna usa sa nahimong epektibong pamaagi aron makalikay nga mataptan sa maong virus kon diin ang booster gipamatud-an nga dako og tabang aron ma-boost ang immune system sa usa ka indibidwal.
Gumikan niini, ang Panggamhanang Probinsya sa Misamis Oriental pinaagi sa Provincial Health Office (PHO) nga gipangulohan ni Provincial Inter-Agency Task Force Chief Dr. Jerie Calingasan nagpahigayon og tulo ka adlaw nga Booster Shot Vaccination sugod sa nakalabay nga semana sa Provincial Capitol Compound.
Pagsunod kini sa kampanya sa Department of Health nga mas pahugtan pa ang mga lakang batok COVID-19 pinaagi niining kalihokan.
Mapasalamaton kaayo ang mga nabakunahan ngadto kang Gobernador Bambi Emano sa kahigayonan nga gihatag kanila aron makabaton sila og dugang proteksyon batok sa COVID-19, hilabina karon nga padayon ang pag-mutate sa virus.
Tungod sa paspas nga pagkunhod sa kaso sa COVID-19, wala damha ni Ms. Kaye Zyllah Mae A. Cammanong nga gikan pa sa Upper Balulang, Cagayan de Oro City nga dali nga napatuman sa Panggamhanang Probinsya ang vaccination roll-out sa booster shot.
“I was pleased because I was expecting nga medyo dugay-dugay pa especially sa news nga nihinay ang vaccination roll-out so I was pleased nga naa na diay siya karon,” matud Ms. Cammanong.
Sa iyang bahin, nakadayeg sab si Ms. Michelia O. Capadocia, 60 anyos, sa pamaagi nga gibuhat sa PHO ug PDRRMO gikan sa registration, counselling, screening, vaccination hangtud sa post-vaccination nga proseso.
“Nagpapasalamat kami for this opportunity kasi very orderly ang pag-conduct nong pag-queue, pag-line, especially sa mga senior citizens na katulad namin. Very thankful kami the way it was conducted.” malipayong sulti ni Ms. Capadocia.
Gisaksihan sab mismo ni Gobernador Bambi ang booster shot ug gipasalamatan niini og dako ang tanan nga misuporta sa walay pag-duha-duha nga nisumiter sa ilang kaugalingon sa pagpatupok sa booster.
Padayon nga giawhag sa Gobernador ang katawhan sa lalawigan nga pahimuslan kini nga oportunidad aron mas hugot pa nga maprotektahan ang kaugalingon batok sa Covid-19 ingon man sa nagkalain-laing variant sa nasangpit nga virus.
(Source: Provincial Health Office | Misamis Oriental Provincial Information Office Facebook page)