Malampuson ug malinawon nga nahimo ang unang adlaw sa 2026 Bar Examinations kagahapong September 6 sa University of San Jose-Recoletos (USJ-R) Basak Campus sa Cebu City, diin walay natala nga untoward incident.
Gipasalig sa Police Regional Office 7 (PRO7) nga andam ang kapulisan sa pagpanalipod sa mga examinees, examination personnel ug uban pang miapil sa Bar Exams. Matud ni PRO7 Regional Director PBGen Arnold E. Abad, gipahimutang na ang tanang gikinahanglang security measures aron masiguro ang kalinaw ug kahapsay sa eksaminasyon.
Ang Cebu City Police Office (CCPO) nagdeploy og igong mga personnel, lakip ang EOD Unit, Quick Reaction Teams, SWAT ug Intelligence Unit. Mitabang usab ang Cebu City Transportation Office, Cebu City Disaster Risk Reduction and Management Office ug Bureau of Fire Protection, uban sa koordinasyon sa Supreme Court Office of the Judiciary Marshals.
Sa 1,519 ka rehistradong examinees, 1,326 ang mitake sa unang adlaw sa eksaminasyon nga nagsugod alas-8 sa buntag. Gipahigayon usab sa kapulisan ang traffic ug security measures palibot sa examination venue aron hapsay ang paglihok sa mga examinees ug publiko.
Gipadayag sa PRO7 nga ipadayon ang hugot nga seguridad ug koordinasyon sa mga partner agencies sa mosunod pang mga adlaw sa Bar Examinations aron masiguro ang luwas, malinawon ug hapsay nga pagdumala sa 2026 Bar Exams sa Central Visayas.
I via Renante Socia Lada