Gawas sa sakit sa baboy nga African Swine Fever, gipaningkamot karon sa Panggamhanang Lokal sa Misamis Oriental pinanguluhan ni Gobernador Bambi Emano nga dili makasulod ang Avian Influenza o mas naila nga “Bird Flu” sa probinsya.
Gitaho ni Provincial Veterinary Officer Dr. Benjie Resma atol sa senimanang pagpakayab sa nasudnong bandila sa Kapitolyo Probinsyal sa miaging semana nga kasamtangang gibantayan karon ang maong sakit nga dili makasulod sa probinsya tungod sa outbreak niini sa Luzon partikular na didto sa mga probinsya sa Pampanga ug Bulacan.
Aron mapugngan ang posible nga pagkuyanap sa maong sakit, gibutyag ni Dr. Resma nga nakigsabot sila sa National Veterinary Quarantine Services nga dili sa magpasulod og produktong balut sa Laguindingan Airport hilabina sa Pampanga tungod kay 90 porsiyento nga supplier kini sa balut sa lalawigan.
“Ato ni silang ginabantayan kay mostly sa atong balut gikan sa Pampanga and this bird flu nga sakit is zoonotic, makatakod sa tawo so mao ni ang atong area of concern,”matud ni Dr. Resma.
Niining unang semana sa bulan sa Enero, ang buhatan nakakolekta nasab og mga blood samples sa mga manok palibot sa probinsya kung asa negatibo tanan ang resulta niini.
Gipasalig ni Dr. Resma nga luwas ang suplay sa manok sa Misamis Oriental pinaagi sa hugot nga monitoring susama sa paningkamot niini sa ASF nga karon sa taas na nga panahon nga zero ang kaso dinhi sa lalawigan.
(Source: Provincial Veterinary Office | Misamis Oriental Provincial Information Office Facebook page)