Pagasugdan ang bag-ong clustering sa mga munisipyo sa probinsya sa Misamis Oriental sugod tuig 2023 pinaagi sa Sangguniang Panlalawigan Ordinance No. 1448-2019.
Subay sa SP Ordinance No. 1448-2019 nga giila nga General Revision of Schedule for Fair Market Value nga giaprobahan ning bag-o sa Sangguniang Panlalawigan uban ang buhatan sa Provincial Assessor sa pagpangulo ni Engr. Marilyn Legaspi gitakda ang bag-ong clustering sa mga munisipyo nga magasugod sa tuig 2023.
Sumala sa ordinansa, gigrupo sa unom (6) ka cluster ang 23 ka-munisipyo sa probinsya sa Misamis Oriental. Ang mga cluster gilangkoban gikan sa Cluster 1 ngadto Cluster 6. Ubos sa Cluster 1 ang munisipyo sa Jasaan, Opol, Tagoloan ug Villanueva.
Sa Cluster 2 nabutang ang munisipyo sa Laguindingan. Naa sa Cluster 3 naplastar ang mga munisipyo sa Balingasag, Claveria, Initao ug Lugait. Samtang ang munisipyo sa Alubijid, Gitagum, Naawan, Manticao ug Medina anaa sa Cluster 4.
Ang Cluster 5 gilakipan sa munisipyo sa Libertad, Magsaysay, Salay ug Talisayan ug ang Cluster 6 anaa ang munisipyo sa Balingoan, Binuangan, Kinoguitan, Lagonglong ug Sugbongcogon.
Ang gibasehan sa pag-cluster sa mga munispyo mao ang kalihokan sa ekonomiya sa matag munisipyo ug ang bag-ong clustering ang mahimong sumbanan sa pag-ila sa bag-ong kantidad sa mga kabtangan sa matag munisipyo.
Gisiguro sa Panggamhanang Probinsyal sa Misamis Oriental sa pagpangulo ni Gobernador Bambi Emano nga anaa sa tukma sa panahon ug lokasyon ang mga kantidad sa mga kabtangan o real property sa probinsya ug masiguro ang patas nga pag-implementar sa bag-ong ordinansa alang sa padayon ug progresibong kalambuan sa tibuok probinsya sa Misamis Oriental.
(Source: SP-MisOr | Misamis Oriental Provincial Information Office Facebook page)
