Malipayon kaayo ang mga kabataang Sarangan, mga nag-eskwela sa kolehiyo, human nadawat nila bag-uhay lang ang Twenty-five Thousand Pesos (P25,000) cash matag usa gikan sa Sulong Sarangani flagship program ni Governor Steve Chiongbian Solon sulod sa Sarangani Capitol Gymnasium.
Ang maong salapi Baynte Singko Mil ka pesos (P25K) ang ayuda alang sa karon nga school year sa ilang pag-eskwela, ug padayon pa silang makadawat og susamang ayudang pinansyal sa musunod nga mga tuig hangtud nga mahuman sila ug makakuha og tag-upat ka tuig nga kurso.
Pinasahi kini nga pet project sa Sulong Kabataan program ni Governor Solon pinaagi sa Provincial Youth Development Office sa pagpanguna nila Bimbo Tablazon ug Gretchin Bone gumikan ang mga benipisyaryo, kasagaran gikan sa mga kaigsoonang Lumad, mao kadtong mga kabataan nga anak sa mga kanhing rebelde ug gikan sa mga lugar nga kanhing gilihukan sa mga rebeldeng grupo.
Gitawag kini nga IPEACE kon Inclusive Program for the Equal Access to Complete Education nga suportado nila Vice Governor Elmer De Peralta, tanang board member, mga mayores ug nila Senador Manny ug Congressman Ruel Pacquiao. Walay laing katuyuan kundili nga matabangan ang mga pamilya nga manginabuhing normal ug mu-umento ang kahimtang nga wala nay rason nga mubalik pa sa kalihukan.
Katambayayong sa IPEACE program ang mga kasundaluhan partikularminte ang 73rd IB ug 38th IB ug ang E-CLIP program sa PSWDO Sarangani sa pagdumala ni Focal Person Lizet Lopez, kuyog ang opisina ni Sangguniang Kabataan Board Member Rheymar Dian, Paaral para sa Sarangan Scholarship Program Coordinator Glenda Revaño, ug sa technical assistance sa RMMC Gensan o Ramon Magsaysay Memorial Colleges Social Work Program.
Samtang, laing grupo sa mga kabataang Sarangan nagtungha sa kolehiyo ang nakadawat bag-uhay lang pud og Dyes Mil ka pesos (P10K) kada usa sulod gihapon sa Sarangani Capitol Gym gikan sa Sulong Karunungan program ni Governor Solon.
Sila kadtong ma-swerte nga nakasulod sa Paaral Para sa Sarangan Scholarship sa Kapitolyo sa Sarangani karon nga school year kung diin halos niabot sila tanan og trescientos (300) kabuok kabatan-unan. Ang Dyes Mil ka pesos ang allowance para sa ilang first semester.
Sa pikas nga bahin, sa hisgutanan nga bakuna, malipayong gibalita ni Provincial Vaccination Coordinator Razel Bustria ilalum sa buhatan ni Provincial Health Officer Dr. Arvin Alejandro nga wala silay nakitang kakulian sa mga kabataan nga nabakunahan batok COVID-19.
Mas agresibo matud pa ang mga bata sa Sarangani Province edad dose (12) anyos hangtud dise syete (17) anyos nga magpabakuna tungod excited na sila sa face to face nga pagklase.
Gisugdan napud atong Lunes, Pebrero 14, ang pagbakuna sa mga bata sa Sarangani edad singko (5) anyos paingon onse (11) anyos. Daghan kanila mga anak sa mga medical frontliner ug local officials aron ipakita nga luwas ang bakuna bisan pa sa maong pangidaron singko hangtud dise syete anyos.
Source: PIO Sarangani