Makakabuhong ang pag-abag ni Gobernador Bambi Emano ngadto sa walo ka Misamis Oriental Provincial Hospitals (MOPH) sugod nga siya ang namunuan isip amahan sa lalawigan.
Matud ni Gobernador Bambi nga na-improbar og maayo ang mga pasilidad ug nahatagan og mga kalidad nga kagamitan ang tanang Provincial Hospitals.
Gikan sa nagkagidlay nga kanhi awra sa matag balay tambalanan karon ubos sa iyang pamunoan  nahatagan kini og igong atensyon nga nahaw-as sa mga pagsaway kaniadto gumikan sa dili maayo nga mga pasilidad ug serbisyo.
“Kalouy sa Diyos walo atong balay tambalanan, kalouy sa Diyos sukad sa akong pagpungko na-revived nato atong balay tambalanan lakip kagamitan ug sa staffing,” sulti ni Gobernador Bambi.
Gani sa milabayng Taho kon State of the Province Address (SOPA) nga gidalit ni Gobernador Bambi ngadto sa katawhan, lakip niya gihatagan og kinasing-kasing nga pasalamat ang mga medical practitioners nga nanarbaho sa walo ka MOPH tungod sa ilang dedikasyon sa panarbaho ug pagtabang nga mahatagan og seguridad ang maayong panglawas sa tanan.
Pamatoud sa kaligdong sa iyang pamunoan mao ang pagbaton og state-of-the-art facilities sama sa pagpatukod og Isolation Facility nga nahimutang sa MOPH OWWA-Alubijid nga dunay kadak-on nga 1,123.41 square meters ug ang sulod niini anaay 26 bed capacity ug kumpleto sa mga ekipo medikal.
Lakip nahatagan katumanan mao ang Emergency Complex nga nahimutang sa MOPH-Magsaysay kung asa dako kaayo ang kalamposan nga nahatag tungod nagamit ning panahona sa CoVid-19.
Samtang mga portable X-ray machines ang nahatag sab sa tanang MOPH nga bililhon kaayo sa pagsuta sa mga balatian.
Niining  kasamtangan nasinati ang hulga sa panglawas tungod sa CoVid-19 nga pandemya anaa sab nakahatag ang kagamhanang probinsya og dugang mga cadaver bags isip CoVid-19 response ug apparatus.
Dili sab malimtan nga sulod sa katuigan nga namunoan si Gobernador Bambi adunay pag-turn over sa mga bag-ong unit sa ambulansya ug vans nga naapod-apod sa tanang MOPH nga maoy tubag sa ilang yangungo aron nga paspas ug mas epektibo ang ilang paghatag og aksyon sa mga panginahanglanon kalabot sa maayong panglawas.
Nag-unang prayoridad ni Gobernador Bambi ang pagmintinar sa lig-on ug luwas nga panglawas sa iyang ginsakopan ug ang pagsiguro nga anaa sa stable state ang mga balay tambalanan nga maghatag og kahupay sa mga naghambin sa balatian.
Dili magmalampuson ang tinguha ni Gobernador Bambi nga mahatagan og epektibong serbisyong panglawas ang Misamisnon kon wala ang tabang sa tanang frontliners hinungdan dili masukod iyang pasalamat ug pagsaludo ngadto sa tanang lumilihok sa mga balay tambalanan sa lalawigan.
(Source: Misamis Oriental Provincial Information Office Facebook page)