Ipasigarbo sa upat ka mga banggiitang boksidor sa Cagayan de Oro City Amateur Boxing Team ang ngalan ug dungog sa dakbayan ug nasud Pilipinas atol sa ilang pagsalmot sa usa ka international boxing competition didto sa Amman, Jordan.
Gikatakdang mobiyahe karong sa ugmang adlaw, Sabado, Pebrero 26 padulong sa Amman, Jordan sila si Robert Malunoc (46 kgs), Reymond Lofranco (48 kgs), Eljay Pamisa (54 kgs) ug Van Hendriche Abing (50 kgs) aron makigtigi sa prestihiyosong ASBC Asian Youth and Junior Boxing Championship 2022.
Malaumon si Team CDO Amateur Boxing Head Coach Elmer Pamisa nga makaangkon og medalya ang upat ka mga boksidor sa Cagayan de Oro sanglit kondisyon ug praktisado kini sa ensayo bisan pa man ning panahon sa pandemya.
Kahinumduman nga daghan na ang mga produkto sa Cagayan de Oro City Amateur Boxing Program ni Mayor Oscar Moreno kinsa nagmalampuson sa ilang karera sa boksing ug mikulit og kaugalingong pangalan sama ni Tokyo Olympic boxing silver medalist Carlo Paalam.
(Source: CIO | Cagayan de Oro City Philippines Facebook page)