Giturn-over ang duha ka proyekto nga mokabat og ₱2.5 milyon sa Barangay Ilihan, Jose Dalman atol sa pagsaulog sa ika-41 nga Araw ng Ilihan niadtong Agosto 17, lakip ang bag-ong konkretong kalsada ug multi-purpose building nga magsilbi isip Barangay Hall.
Adunay gitas-on nga 188 linear meters ang nahimong konkreto nga kalsada nga nagkantidad og ₱1 milyon, nga gisuportahan sa Provincial Government of Zamboanga del Norte ubos sa administrasyon ni Governor Darel Dexter T. Uy. Samtang, ang Barangay Hall nga nagkantidad og ₱1.5 milyon gipondohan gikan sa 20% Economic Development Fund sa lokal nga pangagamhanan.
Matud ni Board Member Dante Bagarinao, nga mirepresentar kang Governor Uy, nagpakita ang nahimong mga proyekto sa pagtinabangay sa probinsyal ug lokal nga pangagamhanan aron matubag ang mga prayoridad nga panginahanglan sa komunidad. Gipahibalo usab ni Mayor Allen Ferrater ang dugang nga suporta alang sa Ilihan National High School, lakip ang covered court ug mga classroom.
Mitambong sa maong kalihukan si Vice Mayor Juliet Macapaz, mga miyembro sa Sangguniang Bayan, mga opisyal sa Barangay Ilihan ug mga residente. Padayon usab ang lokal nga pangagamhanan sa pagplano ug pagpatuman sa mga proyekto nga gitumong sa pagpalambo sa serbisyo ug imprastraktura sa mga barangay.(JENIFFER JR. DELICA)
Source: Zamboanga del Norte Provincial News Network