Kinumpirmaran ni Gob. Matthew Marcos Manotoc nga adda ti regional flight a nagdisso iti Laoag International Airport idi kalman Disiembre beinte tres.
Pinasingkedanna nga idi damo ket adda ti panagtukiadna nga agdisso ti Phil. Airlines wenno PAL a nagluganan dagiti siyam a pulo ket pito a balikbayan a naggapo idiay Palau iti nadakamat nga erupuerto.
Nupay kasta, maawatanna ti gagar dagiti kakailian a makaawid ditoy pagilian ken saan a napalubusan ti eroplano a nagdisso iti umabagatan a paset ti pagilian gapu iti epekto ti bagyo Odette.
Impakgakna a ti laengen inaramidna tapno saan a mairisgo ti probinsia ken ti salun-at dagiti kakailian ket masapul a sakbay ti panaglugan da iti eroplano ket negatibo dagitoy ti RT PCR test iti uneg ti tallo nga aldaw sakbay ti panagbiaheda ken agdiretsoda iti quarantine hotel ti probinsia.
Malaksid iti daytoy. imbatadna a kiniddawna nga awan ti kaprobinsiaan a maikkan ti gundaway a makilangen kadagiti simmangpet a kakailian pakairamanan dagiti hotel a pag-quarantinan dagitoy.
Inbunannag ni Gob. Manotoc a mabalin nga agpaut dagitoy iti lima agingga iti sangapulo ket uppat nga aldaw dipende iti status ti bakunada kal;pasanna ket maipadalan manen dagitoy ti RT PCR test sakbay a rummuarda iti hotel ken aglugan met laeng dagitoy ti eroplano nga agturong idiay Manila.
Inlawlawagna a kinadua ti gobierno probinsial ti OWWA, BI, Bureau of Quarantine ken PCG a mang-secure kadagiti pasahero Innayonna a malaksid a makatulong ti probinsia kadagiti kakailian tapno makaawidda ditoy pagilian ket mabenipisiaran pay dagiti hotel ken caterer a mangserbi kadagiti kakailian a balikbayan.
(Source: Provincial Government of Ilocos Norte)
