Naragsakan ni Gob. Matthew Marcos Manotoc iti pannakaipaay ti tulong kadagiti kakailian a nakana a naapektaran iti isasaplit ti bagyo Maring ditoy probinsia ken dagiti nauraman ti pagtaengan.
Impeksana ti napalaus a panagyamanna iti awan sarday a tulong ken suporta nga ipapaay ti National Housing authority wenno NHA iti probinsia.
Imbatadna nga itay napalabas a bulan ket nainaguraran ti nueva era resettlement project iti tulong ti nadakamat nga ahensia.
Inlawlawwagna nga ita nga aldaw ket naipaayan dagiti sangapulo ket siam a kakailian a nadadael ti sumagmamano a paset ti pagtaenganda ti saglilima ribu a pisos idinto a ti maysa a kailian a nadadael a naminpinsan ti balayda ket naipaayan ti sangapulo ribu a pisos.
Kunana a nagun-ud dagitoy a tulong babaen iti kinapursigi ni provincial social welfare and development officer Mrs. Corazon Celia Lilian Rin a nagkiddaw ti tulong iti NHA.
Inbunannag a dagiti nauraman a kakailian ket naipaayan ti sagtatallopulo ribu a pisos ti tunggal maysa.
Mainaig iti daytoy, imbatadna nga iti immune-una a gundaway ket nangipaay ti pakpakauna a tulong ti gobierno probinsial ti tulong pinansial kadagiti kakailian a madidigra ti bagyo ken uram.
Kagiddan daytoy, impadanonna iti NHA ti panangnamnamana nga ad-adu pay dagiti maiyestablisar a proyekto ti nadakamat nga ahensia ditoy probinsia.
(Source: Provincial Government of Ilocos Norte)