Maiyur-uray ti panangaprobar ni Gob. Matthew Marcos Manotoc iti kiddaw dagiti mangidadaulo kadagiti nadumaduma a departamento ti gobierno probinsial para iti pannakaipabaro ti kontrata dagiti casual ken job order dagitoy.
Inbunannag ni Mrs. Fe Siason, Human Resource Management Officer ti gobierno probinsial a ti laeng awan iti lamisaan ti gobernador kadagitoy a gundaway ket ti kiddaw para iti pannakaipabaro ti kontrata dagiti agpapaay iti Gov. Roque Ablan Sr. Mem. Hospital a paggapoan ti kaaddoan nga empleado.
Segun kenkuana, katengngaan pay laeng ti bulan ti Nobiembre ket pinalagipannan dagiti mangidadaulo kadagiti nadumaduma a departamento a mangisubmitir iti kiddawda ken ni Gob. Manotoc kagiddan ti “Employees Performance Evaluation” a pagbasaran ti HR ken ti gobernador iti pannakaaprobar ti pannakaipabaro ti kontrata dagiti emepleado.
Imbatadna nga umab-abot iti innem a gasut dagiti empleado a maipabaro ti kontratada. Kunana a nasursuruk ngem tallo gasut dagiti Job Order idinto a nasursuruk ngem dua gasut dagiti casual.
Innayon ni Siason a karamanen iti nasao a bilang dagiti empleado kadagiti hospital ti probinsia.
(Source: Provincial Government of Ilocos Norte)