Gipakusgan sa City Government of Dapitan ang kapasidad sa pagdumala sa evacuation ug pagpanalipod sa mga pamilyang mabakwit panahon sa kalamidad pinaagi sa lima ka adlaw nga Training of Trainers (TOT) on Camp Coordination and Camp Management (CCCM) and Internally Displaced Person (IDP) Protection.
Gipahigayon sa City Disaster Risk Reduction and Management Office (CDRRMO) of Dapitan ang unang adlaw sa maong training sa DCGEA-MPC Function Hall, diin gitigom ang mga local office, ahensya ug uban pang stakeholders aron mapalig-on ang ilang koordinasyon sa panahon sa emerhensiya.
Pinaagi sa pagbansay, gitinguha nga mas maandam ang mga personnel nga mohatag og paspas, luwas, organisado ug makatawhanong serbisyo sa mga pamilyang mapugos og biya sa ilang mga panimalay tungod sa kalamidad.
Lakip sa mga nagpaambit sa ilang kahibalo isip resource speakers ug facilitators ang mga eksperto gikan sa Department of Social Welfare and Development (DSWD) Region IX.
Gitutokan sa training ang husto nga pagkoordinar sa mga evacuation center ug ang pagpanalipod sa mga katungod ug kaayohan sa internally displaced persons o mga tawong napugos og biya sa ilang pinuy-anan tungod sa kalamidad.
Gilauman nga pinaagi sa maong capacity-building activity, mas maandam ang Dapitan sa pag-atubang sa mga kalamidad ug masiguro nga ang mga apektadong pamilya dili lamang mahatagan og tabang, apan maatiman usab sa luwas ug dungganon nga paagi.(IKEN B. GULLEM)
Source: City Information Division- Dapitan