Gipahigayon karong Agosto 24, 2026 ang Capacity Building Workshop on the Regional Project Monitoring and Evaluation System o RPMES sa Central Hall, Provincial Capitol sa Dipolog City, aron mapalig-on ang sistematiko ug epektibong pagmonitor sa mga proyekto sa probinsya sama sa karsada, tulay, eskwelahan, ug mga programa alang sa kalamboan.
Mitambong sa kalihokan sila Department of Economy, Planning, and Development o DEPDev IX Regional Director Maria Felicidad Guerrero, OIC-Provincial Administrator ug Provincial Project Monitoring Committee Chairperson Charmie A. Yu, PPMC Vice-Chairperson Engr. Dioscoro Endab, PPMC Secretariat Augee Velasco, mga Chief of Offices ug Officers-In-Charge nga miyembro sa komitiba, mga personahe gikan sa DEPDev ug Department of the Interior and Local Government o DILG, ug uban pa.
Gipunting sa workshop ang paggamit sa RPMES sa pagsubay sa kahimtang sa mga proyekto, pag-ila sa mga problema sa implementasyon, ug pagtino sa angay nga mga lakang aron matabangan ang implementing agencies ug local government units. Lakip sa mga hilisgutan ang monitoring guide ug problem-solving mechanisms, pagsukod sa project performance ug alert mechanisms, ug paggamit sa rebisado ug standardized forms.
Gipasiugda ni Yu ang kahinungdanon sa pagpalig-on sa kapasidad sa monitoring committee aron masiguro nga ang mga proyekto dili lamang hapsay nga maplano, kondili masubay usab ang aktuwal nga resulta sa implementasyon. Matud ni Guerrero, gitumong usab ang pagpasubay sa mga plano sa probinsya sa nasyonal nga mga plano aron malikayan ang pagdoble sa mga proyekto ug masiguro ang episyenteng paggamit sa pondo sa lokal ug nasyonal nga gobyerno.(JENIFFER JR. DELICA)
Source: Zamboanga del Norte Provincial News Network