Nainaguraran ti tallo a baro a pasdek iti Bangui District Hospital a nagtinnulongan a pinundoan ti gobierno probinsial ken ti gobierno nasional.
Ni Gob. Matthew J. Marcos Manotoc ti nangidaulo iti pannakainagurar dagitoy a pasdek nga inatendaran da Senior Sang. Panlalawigan Member Medeldorf Gaoat, Chairman ti Committee on Health, Provincial Health Consultant pakairamanan ni Dr. Alvin Alcoriza, mangidadaulo iti Bangui District Hospital.
Dagiti nainaguraran a baro a pasdek ket ti Medical Records Building, Isolation Facility ken Holding Facility ti hospital.
Binigbig ti gobernador ti dakkel nga akem ti nadakamat a hospital a kangrunaan a mangserserbi kadagiti kakailian iti umamianan a paset ti probinsia.
Inlawlawagna a masapul nga agtultuloy ti pannakapasayaat ti nasao a hospital kas maikadua a kadakkelan a hospital ti probinsia ken sumarsaruno iti Gov. Roque Ablan Sr. Mem. Hospital.
Mangnamnama ni Manotoc a babaen iti kaadda dagiti tallo a baro a pasdek ad-adda pay a mainspiraran dagiti agserserbi iti hospital a mangipaay ti napintas a serbisio kadagiti kakailian.
Kagiddan daytoy, impadanonna ti napalaus a panagyamanna kadagiti doctor, nurses ken dagiti amin nga agserserbi iti hospital iti naimpapusoan a panagserbida kadagiti kakailian ken iti adu a sakripisio dagitoy nangnangruna iti daytoy a panawen ti pandemia.
Kabayatanna, inpanamnamana nga iti mannarimaan a pannakaisagsagana ti budget ti probinsia para iti masungad a tawen 2022 ket maitultuloy a mailatangan ti pundo para iti ad-adda pay a pannakapasayaat ti Bangui District Hospital.
(Source: Provincial Government of Ilocos Norte)
