Nagagasat dagiti mannalon ditoy Ilocos Norte iti kaadda ti gobernador a mangkitkita iti pannakaipasigurado a saan dagitoy a mabaybay-an.
Daytoy ti impannakkel ni Sang. Panlalawigan Member Domingo Ambrosio Jr. chairman ti committee on agriculture.
Segun kenkuana, dakkel ti pailatlatang ni Gob. Matthew Marcos Manotoc a pundo iti tinawen para iti benneg ti agrikultura.
Impalgakna a dayoty ti rason a naruay dagiti maipapaay nga abono, makina, kagamitan ken de kalidad a bin-I ti maipapaay kadagiti mannalon.
Imbatadna a malaksid kadagitoy ket naruay pay dagiti tulong nga aggapgapo iti DA regional ken central office a kiniddaw ti gobernador.
Mamati ti bocal a daytoy ti mangsulbar iti kinalaka ti presyo ti irik agsipud ta babaen kadagitoy nga ibunbunong ti gobierno probinsial ket maipababa ti gastos dagiti mannalon.
Kabayatanna, inbunannag ti Ambrocio a saan laeng a dagiti mannalon ti naiget a tultulongan ni Gob. Manotoc ngem uray pay dagiti Small and Medium Enpterprises ti probinsia.
Impanamnama ti bocal nga agtultuloy ti pannakaipaay ti tulong kadagiti kakailian gapu iti kinagaget ti gobernador.
Innayonna nga awan sarday ti panangiwanwan ni Gob. Manotoc iti pagsayaatan ti sibubukel a probinsia.
(Source: Provincial Government of Ilocos Norte)