Sikop sa kapulisan sa managlahing operasyon ang siyam ka indibidual batok sa giingong paglapas sa Republic Act 9287, o Illegal Numbers Games Act of 2004, ilabi na sa ilegal nga pagpataya sa “Swertres.”
Base sa accomplishment report sa kapulisan, gipahigayon ang mga operasyon sa nagkalain-laing barangay sa Cagayan de Oro City niadtong Agosto 13 hangtod 15, 2026.
Sumala sa kapulisan, pipila sa mga suspek giila isip mga Swertres usher o collector nga dili otorisado sa Philippine Charity Sweepstakes Office (PCSO).
Kabahin kini sa padayong kampanya sa kapulisan batok sa ilegal nga mga dula sa numero sa Cagayan de Oro City.
Gipahinumdoman sa mga otoridad ang publiko nga gidili sa Republic Act 9287 ang pag-apil, pag-operate ug pagtabang sa ilegal nga mga dula sa numero, ug ang mga molapas niini mahimong atubangon ang tukmang kaso ug silot ubos sa balaod.
Ang mga nasikop gidala sa hustong proseso alang sa dokumentasyon ug legal nga mga lakang.