Adunay 8,877 ka Returning Overseas Filipinos (ROFs) ug Locally Stranded Individuals (LSIs) ang natala karon nga nahibalik dinhi sa probinsya sa Zamboanga del Norte kutob kaniadtong Hulyo 13 ning kasamtangang tuig.
Kini ang nasayran gikan Task Force COVID-19 sa Zamboanga del Norte pinaagi ni Dr. Esmeralda Nadela.
Sa ROFs kun Returning Overseas Filipinos, adunay nakatala nga 416, samtang ang LSIs kun Locally Stranded Individuals adunay 8,461.
Gipaklaro ni Dr. Nadela nga sa matag LSI nga nahidangat dinhi, napailawum kini sa 14-day mandatory quarantine period.
Samtang kalabot na sa update sa COVID-19 dinhi sa Zamboanga del Norte, adunay 12 active cases, 11 recoveries ug walay nakabsan sa kinabuhi.
Niini, si Dr. Nadela kanunay’ng nagpahimangno sa publiko nga mosunod sa health protocols sama sa social/physical distancing, magsuot ug face mask ug batasanon ang pagpanghugas ug kamot gamit ang sabon ug tubig.
