Mokabat 177 ka baboy gikan sa 44 ka mga apektadong backyard swine raisers sa Brgy. San Simon ang gi-cull sa miaging gabii, kini aron mahunong ang pagkuyanap sa African Swine Fever (ASF) sa maong dapit ug sa silingan nga mga barangay.
Ang gi-cull nga mga baboy nakasulod sa 500-meter radius gikan sa red zone o area diin natala nga adunay nangamatay nga baboy human nataptan sa ASF.
Tumong sa pag-cull sa mga baboy aron dili na mokuyanap sa laing barangay ug motakod sa mga baboy.
Mga personahi sa City Disaster Risk Reduction and Management Office, City Veterinary Office, Agricultural Productivity Office, ang nangulo sa pag-cull sa mga baboy uban sa City Engineering Office, Cagayan de Oro City Police Office, ug military personnel.
Si Reg’l Dir. Carlene Collado sa Department of Agriculture subling namahayag nga ang apektadong mga backyard swine raisers makadawat og P5,000 sa matag baboy nga ma-cull isip indemnity payment gikan sa ilang buhatan. Ug laing P2,000 nga gikan sa syudad.
Nunot niini, subling gipahinumduman sa Anti-ASF Task Force sa syudad ang tanang negosyante ug biyahero nga mosunod gayud sa mga guidelines ug undangon na usab ang pagpagawas ug pagpasulod sa mga baboy gikan o paingon ning syudad.
Samtang giaghat usab ni City Veterinarian Dr. Lucien Anthony Acac ang mga backyard raisers nga mo-report dayon sa City Veterinary Office kung adunay kalit nga pagsakit ug pagkamatay sa ilang mga baboy partikular na sa ilang dapit. (CIO-CdeO)
