Nagmalamposong gilusad kagahapong adlawa ang operasyon sa SOCOTECO 2 kauban ang mga elemento sa National Bureau of Investigation kon NBI alang sa routinary check sa mga metrohan sa mga residente sa AlphineVill Subdivision , Barangay Lagao ning syudad sa Gensan .
Matud pa ni Jack Ramiso ang Public Relation Officer ug tigpamaba sa South Cotabato Electric Cooperative 2 nga regular program sa maong koperatiba sa sugang dagitabnon ang maong kalihokan aron masiguro nga sakto ang metrohan ug walay nahitabong kinawatay ug kuryente kon pilferage aron dili molampas ang system loss sa gilatid sa ERC kon Energy Regulatory Commission policy. Ang system loss bayaran ug bahinon sa tanang mga myembro resulta sa pagpangawat ug kuryente kon nasayang nga kuryente ug wala naapil sa kwentada ug nadaut ug gikulikot ang metrohan sa matag household electric consumers .
Kauban sa maong operation mao ang mga Engineers ug mga linemen ug gi-isa –isa ug check ang tanang mga metrohan sa maong subdivision .
Gidugang ni Ramiso nga initial finding nila mao ang pagkaguba sa mga ERC seal sulod sa metrohan kon posibilidad nga gitandog ug gihilabtan ang metrohan , tamper sa sulod sa metro ug padalhan matud pa ug sulat ang mga hintungdang tag-iya sa mga panimalay ug ipasa sa legal department sa SOCOTECO 2 .
Posibling magpahigayon ug back billing tungod sa posibling nawala ug wala na kwenta nga konsumo sa mga tagabalay .
Sumala ni Engineer Jefferson Pia sa SOCOTECO 2 nga pipila sa ilang nakita mao ang buak nga ERC seal kon naabrihan ang mga metrohan sa dili otorisadong mga tawo , tampered nga mga check meter kon gituli or adunay mga alien device sulod sa metrohan kon posibling pilferage .
Apan wala pa silay gikumpirma niini tungod ipaagi pa ug proseso .
Sumala pa ni Engineer Pia nga mokabat sa 20 % sa tanang na inspection nga metrohan sa kuryente sa maong subdivision ang adunay deperensiya ug wala sa standard kon naabrihan ug nahilabtan ang mga selyo sa ERC.
Aduna pay nakita nga ang connection sa balay ang direktang gi tap sa secondary line kon supply sa SOCOTECO 2 nga wala naagi sa check meter ug lain pamaagi mao ang grounding .
Giklaro usab ni Engineer PIA nga mga tirador kon expert nga electrician ang mihimo sa maong pamaagi susama sa wire jumper ug grounding .
Ipatawag ang maong mga tag-iya sa balay ug myembro sa SOCOTECO 2 nga nakitang adunay problema sa maong natigayon nga inspection ug masuta nga gituyo ang pagpangawat ug kuryente kon pilferage makasuhan kini sa korte ug makamulta subay sa balaud ug ang extreme nga silot mao ang permanent disconnection ug dili na pwede magpakutay ug kuryente sa SOCOTECO 2.
Gilauman nga daghan pang mga operasyon nag himuon sa mga element sa SOCOTECO 2 kauban ang NBI SarGen pipila ka adlaw gikan karon .
Ubos kini sa kamanduan ni OIC- General Manager Geronimo Desesto ug uban pang mga opisyal sa maong koperatiba ug mga Board of Directors sa pagpanguna ni Mr. Jose Santos ang Chairman . ( Roniel Degorio – RPN DXDX Gensan)
