Ang lokal nga kagamhanan sa syudad sa Cagayan de Oro mipahimutang sa dugang medical workers sa Laguindingan airport ug pantalan sa Macabalan samtang gatusan ka mga returning overseas worker ug stranded residents ang mangabot matag adlaw gikan sa Manila. Si Mayor Oscar Moreno nagsugilon nga ang battlefront batok Covid-19 nabalhin gikan sa urban poor communities sa dakbayan ngadto sa maong mga port of entries samtang tulo pa ka dugang positibo sa kaso ang gikareport kagahapong adlawa. Matud ni Moreno, iya nang gimanduan ang City Health Office sa pagpahiluna sa Health Workers 24/7 sa Laguindingan Airport sa Misamis Oriental ug Macabalan Port dinhi sa Cagayan de Oro. Ang maong mga health workers didto ra matulog aron sa pagpaabot sa mga bag-ong mangabot, matud pa ni Moreno.
Gibutyag ni City Health Office epidemiologist Jose Retuya nga ang tulo ka mga returnees, duha overseas workers ug usa ka stranded resident nga nahidangat sa miaging semana nabaw-an nga positibo sa Covid-19 pinaagi sa RT-PCR test. Sila dayong tulo ang gipadala sa City Isolation Unit aron sa pagpailawom sa 14 dias nga kwarentina sa wa pa gikuha ang swab test.
Si Mayor Moreno midugang sa pagsugilon nga ang mahinungdanon kaayo tungod kay adunay moabot 93 ka mga workers ug residents ang mahidangat matag adlaw.
Matud niya ang mga returning workers ug residents nakatampo sa total nga 49 active cases sa 79 na ka cumulative Covid-19 cases sa Cagayan de Oro.
Niadtong Martes, usa ka barko ang gi-hire sa National Inter-Agency Task Force arm sa pagpakanaog sa moabot 400 ka mga residente sa Basilan, Sulu ug Tawi-tawi sa pantalan sa Macabalan ning syudad. Ang mga stranded residents ang gipangdala sa gym sa University of Science and Technology of Southern Philippines in Cagayan de Oro diin sila nag-atang sa mga bus nga mohatud kanila sa ilang tagsa-tagsa ka panimalay.