Cebu City- Gitugot na sa government task force against coronavirus disease 2019 ang back-riding sa motorsiklo sa managtiayon sugod karong adlawa, Hulyo 10.
Mao kini gipahibawo mismo ni Interior Secretary Eduardo Año gahapon sa buntag.
Matod pa ni Año, sugod karon mahimo nang mag-uban ang magtiayon sa motorsiklo pero kadtong prototype model nga giingon ni Gob. Arthur Yap sa Bohol.
Sumala pa niya, aprobado na sa National Task Force ang tandem sa magtiayon sa prototype nga motorsiklo.
Si Año, nga vice chairman sa IATF o Inter Agency Task Force on Emerging Infectious Disease, mianunsyo niini atol sa usa ka interview sa Teleradyo.
Ang maong model sa motor naay divider tali sa drayber ug sa backrider busa dili gyod sila magdikit.
Gitataw usab sa kalihim nga kinahanglan gihapong magsul-ob og facemask ug maghelmet ang rider ug passenger.
Giklaro usab ni Año nga ang iyang gipasabot sa magtiayon dili lang kadtong kinasal kondili hasta ang nagpuyo-puyo lang.