SCHEDULE ALANG SA MASS BLOOD DONATION SA KABARANGGAYAN GIANUNSYO SA CLUSTER COORDINATOR SA CITY HEALTH
Gianunsyo sa Cluster Coordinator sa Non-Communicable Diseases sa City Health Office ang schedule alang sa Mass Blood Donation Program sa kabaranggayan.
Sumala ni MRS. EVANGELINE CERIO nga karong adlawa, Hunyo 23, gipahigayon ang bloodletting didto sa isla sa Brgy. Alang-Alang; Hunyo 25 didto sa Baybay; Hunyo 26 didto sa Buenavista; Hunyo 30 didto sa Danawan; ug Hulyo 2 didto sa Brgy. Silop.
Giingon ni Mrs. Cerio nga ang pagdonar ug dugo bisan ka usa lang ang makasalbar ug tulo ka kinabuhi, diin ang average kaniadto sa panginahanglan ug dugo sa Caraga Regional Hospital anaa sa 30 ka bags matag adlaw ug wala pa’y labot ang sa laing mga ospital.
Gidugang niini nga pinaagi sa mga tabang ug pagkoperar sa mga Kapitanes ug Barangay Health Workers nagpadayon ang maong programa ug nakab-ot ang 872 ka blood bags o 52% sa Mass Blood Donation gikan sa bulan sa Enero hangtod Hunyo ning tuiga. (Jun Prex Salubre, Ronda 6 RPN DXKS)
