Human sa kapin usa ka tuig nga pagtago sa dihang gikasuhan ug syndicated Estafa , nahulog ra sa mga kamot sa otoridad ang mag-asawang giilang founder sa Munificence Ministry Investment kon MM scam dinhi sa syudad sa Gensan nga mao sila si Pastor Rolando Joseph Jr. ug asawa niining si Pastora Doris Fe Cadallo Joseph nga taga–Sto. Nino Apopong, GenSan City ug kasamtangang nagpuyo sa Block 6 Lot 19 , Gran Europa, Brgy. Lumbia , dakbayan sa Cagayan de Oro pasado alas dyes sa gabii Nov. 3, 2020.
Matud pa sa kapulisan kauban nila ang mga elemento sa CIDG kon Criminal Investigation and Detection Group ilawom sa oplan pagtugis kon composite team sa kasong syndicated Estafa ug pinasikad sa warrant of arrest nga gipagawas ni Judge Rebecca Seredrica tungod sa nahaunang reklamo sa mga miyembro sa maong investment scheme nga wala na nakadawat ug tubo sa ilang kwarta human nga milayas ang mga nasampit .
Ang magtiayon ang gitudlong founder sa Munificense Ministry Investment scam nga nag-operate sa SOCCSKSARGEN region kon diin daghan ang nahimong biktima sa multi–million pesos investment scheme nga nahimong scam. Human sa kamanduan ni Presidente Rodrigo Duterte nga gukdon ang mga mangingilad apil nga nawala sa GenSan sila Pastor Joseph ug uban pang investment scammers matud pa nga kasagaran mga Pastor susama nila Pastor Joel Apolinario sa Kapa community Ministry Incorporated, Act of Charity Pastor Bernie Baustista ug daghan pa . (Roniel Degorio, RPN DXDX GenSan)
