Pagadian City – Malipayon nga gidawat sa upat ka mga eskwelahan dinhi sa dakbayan sa Pagadian ang mga school & office supplies nga gikan sa Provincial Government sa managlaing adlaw karong semanaha.
Lakip sa mga nakadawat sa maong supplies mao ang Kawit Elementary School, San Pedro Elementary School, Sta. Lucia Elementary School ug Tuburan Elementary School.
Gilangkuban kini sa ballpen, lapis, sharpener, padpaper, og kinarton nga mga book paper nga gisulod sa usa ka plastic envelope aron iapod-apod ngadto sa mga estudyante og mga magtutudlo.
Hisayran nga tungod sa kawad-on, hinungdan sa nasinating pandemya, mikuot nalang sa kaugalingong bulsa ang mga magtutudlo aron makaprinta sa mga modules nga mao na unyay gamiton sa mga studyante alang sa ilang pagmatuto. Apan gibutyag ni Attorney Jackie Bana nga nakapangita og pamaagi ang kagamhanang probinsiyal aron maabagan ang mga pampublikong tulunghaan ning syudad.
Dugang pa ni Atty. Bana nga bisan paman dili na kini sakop sa provincial government, apan padayun gihapon silang mutunol sa mga tabang ilabi na sa mga estudyante aron makahatag og paglaum ngadto kanila.
Gitino usad sa abogada nga napahimuslan na ang Special Education Fund kon SEF alang sa mga tulunghaang pambubliko sa probinsya.
Tungod sa malampusong kampanya batok smuggled cigarettes, nakadawat og pinansiyal nga pahalipay ang probinsya gikan sa usa ka kompanya sa sigarilyo hinungdan nga gisugyot gilayon ni Atty. Jackie ngadto ngadto kang Governor Yu nga itabang ang pundo niini aron ipalit og mga pangihanglanon sa mga magtutudlo ug estudyante sa mga pampublikong tulunghaan sa Elementarya.
(Source: ZDS Press Bureau, photos courtesy of Atty. Jackie Bana)
