Pagadian City – Namatikdan karon ang inanay nga pagsaka sa COVID-19 cases sa Zamboanga del Sur subay sa pinakaulahing update nga gipagawas sa Integrated Provincial Health Office (IPHO).
Adlawng Martes, Enero 4, mitala og kinatibuk-ang 10 ka kaso ang probinsya human madugang ang 3 ka kaso. Mao kini unang higayon nga mibalik sa “double-digit” ang ihap sa active cases sukad kaniadtong Disyembre 20, 2021.
Pag-abot sa adlawng Mierkules, Enero 5, nadugangan og laing 7 ka positibong kaso ang lalawigan hinungdan nga mas misaka ngadto sa 17 ang total active cases. Mokabat sa 145 swab samples ang gi-test sa maong adlaw.
Sumala ni Dr. Anatalio Cagampang Jr., usa sa maong mga nagpositibo ang naka-admit sa Zamboanga del Sur Medical Center samtang ang laing 6 nagpositibo human gi-test isip kabahin sa ilang work requirement.
Gipahimangnoan karon sa Provincial Health Office ang katawhan nga magmabinantayon ug mahimong responsible sa pagsunod sa naandang health protocols ilabina nga nakatala na ang nasud og local transmission sa Omicron variant, ang bag-ong strain sa COVID-19 nga naila sa paspas nga pagpanakod.
(Source: Zamboanga del Sur press bureau, photo courtesy of ZamboSur Covid-19 updates Facebook page)