Zamboanga del Sur – Mokabat sa 53 ka mga day care workers ang midawat og honoraria gikan sa provincial government adlawng Huwebes sa usa ka simpleng programa nga gipahigayon sa Executive Function Hall sa Provincial Capitol.
Si PSWDO Head Ermilina Bacatan nagkanayon nga ang maong honoraria sa mga day care workers timaan sa paghatag og pagtagad sa ilang nahimong katungdanan ingon nga ikaduhang ginikanan sa mga kabataan sa ilang barangay.
Segun ni Bacatan nga alang sa mga accredited day care workers, modawat sila og tag-₱ 3,600 samtang ₱ 1,200 sa mga dili accredited ug ₱ 1,800 alang sa mga expired na ang accreditation.
Si Governor Victor Yu mipadayag nga ang paghatag kanila og financial assistance usa ka pamaagi sa pag-ila sa ilang kontribusyon sa komunidad ug aron madasig sila nga mas motrabaho pa sa ilang tahas sa pagtudlo sa mga bata.
Atol sa maong aktibidad, nagpa-raffle usab si Gov. Yu ug Cong. Yu sa mga day care workers diin lima (5) kanila ang swerteng nakaangkon og mga Smart TV alang sa ilang mga Child Development Centers.
Mitambong sa maong programa si Deputy Speaker Divina Grace Yu ug mayoralty aspirant Atty. Jackie Bana nga parehong midasig sa mga day care workers sa pagpadayon sa ilang kakugi sa trabaho. Presente usab ang mga councilor aspirants nga mihatag og mugbong mensahe sa maong panagtigom.
(Source: Victory Zamboanga del Sur)