Cebu City- Nakatala og 45 ka bag-ong kaso sa coronavirus disease ang dakbayan sa Sugbo sa unang adlaw sa pagpaubos sa GCQ o general community quarantine.
Atol sa live press conference gahapon, si City Atty. Rey Gealon mipahibawo nga ang bag-ong mga kaso gilangkoban sa lima ka kaso sa brgy. Suba, tagup-at sa San Nicolas ug Pasil, tulo sa Sawang Calero, tagurha sa Cogon-Ramos, Ermita, Lahug, ug Pahina Central; ug tagsa sa Apas, Basak-Pardo, Bulacao, Calamba, Kamputhaw, Capitol-Site, Hipodromo, Kalunasan, Labangon, Lorega, Sambag 2, Tejero, Tisa, T. Padilla ug Tinago.
Tungod niini, miabot na og 2,319 ang tanang kaso sa dakbayan apan 1,297 na lay aktibo.
Midugang si Gealon nga ang ihap sa mga naulian sa mga masakiton miabot na og 995 human madugangi og 18.
13 sa uwahing nakarekober gikan sa brgy. Tejero ug tagsa sa brgy. Labangon, Basak-Pardo, Mabolo, Mambaling, ug Duljo-Fatima.
Subay niini, si Gealon, nga nagsilbing tigpamaba ni Mayor Edgardo Labella, mitambag sa publiko nga magmaigmat ug mosubay sa health protocols bisan kon gipalugakan na ang ubang quarantine measures nunot sa deklarasyon sa GCQ.