Gibutyag karon ni SDS kon Schools Division Superintendent Gildo Mosqueda nga gi-respeto sa DepEd Sarangani ang mga reaksyon sa mga ginikanan kung nag-alanganin o dili ba kaha magdumili usa sila nga ipa-enroll ang ilang mga anak karon nga school year 2020-2021 gumikan wala pay bakuna nga na-imbento batok sa makamatay nga Coronavirus. Demokrasya matud pa ang nasud Pilipinas nga angayan respetuon ang mga katungod.
Apan gipamahayag niini nga gikinahanglan usab nga magpadayon ang pag-angkon og edukasyon aron dili mahunong ang nasugdan ug ang hunat sa mga kabataan. Ang gikaingon nga “momentum” sa pagpaningkamot. Sila matud pa sa DepEd Sarangani ang nangandam na alang sa pag-abri sa klase karong Agosto 24 kung wala nay mga kakulian ug bag-ong direktiba sa nasyonal nga gobyerno.
Kagahapong adlawa, pormal nga nagsugod ang remote enrolment kon pagpa-enroll pinaagi sa Facebook, Messenger ug sa celfone. Mahuman ang enrolment sa Hunyo 30. Segun ni SDS Mosqueda, niaging semana pa sila nanawat og enrolment sa tibuok Sarangani Province. Nakapahigayon na matud pa sila og profiling niagi pang mga bulan aron mapangutana na kung unsang modality ang pillion sa bata.
Karon nga enrolment period, ma-kumpirma kung unsay final pilion nga option sa estudyante, kung haum ba sa iyang sitwasyon ang online schooling gamit ang internet, modular gamit ang printed materials o dili ba digital pinaagi sa USB, o dili ba kaha ang pagdungog sa mga lecture pinaagi sa pagpaminaw sa istasyon sa radyo o paglantaw sa telebisyon.
Sa unang duha ka semana (first 2 weeks) karong bulan sa Hunyo, dili na kinahanglan nga muadto pa ang ginikanan ug magtutungha sa ekswelahan aron ma-enroll. Mu-kontak lang sa ilang mga classroom adviser sa nakalabay nga school year aron magiyahan sa mga angay buhaton.
Kadtong dili maka-kontak tungod walay celfone ug internet, pwedeng muadto sa tulunghaan sugod sa ikatulong semana (3rd week) sa Hunyo aron makapa-enroll apan dapat mutuman sa health protocols, sama sa paggamit og face mask, physical distancing nga duha (2) ka metros, ug pagpanghinlo sa mga kamot.
Sa school calendar nga giandam sa DepEd National Office basi sa Basic Education Learning Continuity Plan nga gibuhat ni DepEd Secretary Leonor Briones ug gi-uyunan ni Pangulong Rodrigo Duterte, mahimong “compressed school year” ang mahitabo tungod magsugod ang klase sa Agosto 24 ug takda kining matapos sa Abril 30 sunod tuig 2021, anaa na lang sa walo (8) ka bulan.
Matud ni SDS Mosqueda, tulo (3) ka oras lang ang gipangayo matag adlaw sa mga estudyante nga magtuon maunsa mang modality nga ilang mapilian. Pilion sa Department of Education ang pinaka-importanteng leksyon nga matun-an sa bata matag semana gitawag nga “most essential learning competencies.”
Nagka-meeting na ang Sarangani Provincial School Board aron i-plastar ang mga kalihukan. Natigum napud ni DepEd 12 Regional Director Allan Farnazo pinaagi sa zoom teleconference ang pito (7) ka mayor sa Sarangani Province kauban si Governor Steve Chiongbian Solon. Samtang, nagkatigum usab ang mga Sarangani mayor aron makahatag sa ilang mga rekomendasyon basi sa aktwal nga kahimtang sa ilang munisipyo, sa pagsuporta kana nila Vice Governor Elmer De Peralta, mga board member ug nila Senador Manny ug Congressman Ruel Pacquiao.