Duha na usab ka pasyente sa COVID-19 ang naulian ug nakagawas na karong adlawa sa Zamboanga del Norte Medical Center.
Sa nasayran gikan ni Ms. Marnie Omamalin, ang Chief Nurse sa maong tambalanan nga sila si Patient 142 migawas sa buntag, samtang si Patients 139 migawas usab pagkahapon ug pulos naulian na sa COVID-19.
Si Patient 142, 50 anyos, usa ka lalaki ug taga Barangay Gulayon ning dakbayan sa Dipolog ug walay travel history gawas dinhi sa probinsya.
Sugod kining na-admit sa maong tambalanan kaniadtong Oktobre 12, ug comorbid sa diabetes.
Nianang alas 3:00 ang takna sa hapon, migawas usab si  Patient 139.
Samtang si Patient 139 usa ka lalaki, 39 anyos, nanimuyo sa lungsod sa Piñan ug walay travel history kinsa na-admit sa Zamboanga del Norte Medical Center kaniadtong Oktobre 14.
Sa makausa pa, ang maong tambalanan nagpasalamat sa Kahitas-an ug sa mga doctors ilabi na nila Dr. Rose Portia Zerrudo Ompoy ug Dr. Rosinee Monte sa ilang walay puas nga serbisyo alang sa COVID-19 patients, mga nurses kinsa miatiman sa maong mga pasyente ug ang mga tig-limpyo sa maong isolation ward nga kanunay gihimong limpyo ug hapsay ang maong isolation ward.
Samtang si Dr. Esmeralda Nadela, ang Acting Hospital Administrator sa ZNMC subling nagpahimangno sa publiko nga aron malikayan ang pagkuyanap sa COVID-19, magpundo lamang sa balay kung walay importanteng tuyo sa gawas, batasanon ang paghugas sa kamot gamit ang sabon ug tubig o dili ba mogamit sa alcohol ug hand sanitizer, kanunay magsuot sa face mask ug face shield, magmintinar sa social distancing kung anaa sa pampublikong lugar. (Provincial Information Center – mbmontederamos)
