Kinahanglang ipatuman ang tukmang silot ngadto sa mga establisamento nga nalambigit sa kaso sa child trafficking dinhi sa dakbayan sa Cagayan de Oro.
Mao kini ang panawagan ni konsehal Girlie Balaba, chairman sa komite sa social services, atol sa sesyon sa konseho niadtong Lunes nga gidumala ni bise mayor Kikang Uy, human iyang nasayran ang nagkataas nga kaso sa child abuse ug child trafficking dinhi sa syudad.
Aron maangkon ang hustisya, ang konsehal mihangyo nga unta seryosohon sa lokal nga kagamhanan ang pagpahamtang sa silot ngadto sa mga establisimento nga nalambigit sa hiwing binuhatan.
Atong kaakuhan nga protektahan ang kabataan batok sa bisan unsang matang sa pang-abuso ug pagpanamastamas, sumpay ni Girlie.
Gani, atong makita nga nag-antos na ang kabataan sa kapobrehon ug kagutom bisan pa sa panahon nga wala pa ang pandemya ug nakalimtan na nga sila ang labing apektado ilabina kadtong mga giabusohan ug gipasagdan dinha sa ilang kaugalingong mga panimalay, dugang sa konsehal.
Siya miingon nga gumikan sa pagpatuman sa online classes sa tinguha nga dili mabalda ang pagtungha sa kabataan, mas nabutang hinuon sila sa dakong risgo tungod kay ang paggamit sa internet nag-expose kanila sa cyber predators ug niinang gamay o’ dakong gadget dali kaayong maagni ug madala sa cybersex activities.
Gibutyag ni Balaba nga sa milabayng tuig mokabat sa 15 ka kaso sa child trafficking ang natala sa milabayng tuig itandi sa usa lang sa tuig 2019 ug 12 niini, gidala dinha sa mga inn.
Napasakaan man sa kaso ang mga nalambigit apan walay aksyon batok sa mga tigdumala ug tag-iya sa mga inn diin na-rescue ang maong mga bata ug dili angayang mohunong ang dakbayan hangtod nga aduna pay kabataan nga mag-antos sa pang-abuso ug pagpanamastamas, panapos ni konsehal Girlie Balaba. (Sangguniang Panlungsod – CdeO)
