Human sa tulo ka buwan nga pag tago-tago nasikop na gyud sa Cebu City Police Office ang suspetsado nga naka hit-and run sa usa ka basketball player.
Pasado alas 3:11 kagahapon sa hapon, Mayo 6, 2024, nasikop ang suspetsado nga si Aaron Karl Tan sa kapulisan.
Ang pagkasikop pinasikad sa usa ka Warrant of Arrest nga gi issue sa Cebu City Prosecutors Office, diin walay piyansa nga gikatakda.
Basi usab kini sa mga saksi ug security camera footage na maoy nagtumbok ni Tan nga sakay ug nagmaniho sa sa Mazda CX7.
Mahinomduman nga niadtong Pebrero 4, 2024 sa kadlawon, gi dasmagan ug gibiya-ang patay ang biktima nga si Jeslar Larumbre, 23 anyos ang panuigon, didto sa Queens road kilid sa Redemptorist Church, dakbayan sa Sugbo.
Atol sa maong panghitabo wala miangkon si Tan og pasangil niya nga lain ang nimaniho sa iyang sakyanan.
Ang kapulisan padayon pa usab nagsusi kung unsay motibo sa suspetsado sa iyang pagbangga sa biktima nga ni resulta sa kamatayon niini.
Sa pagkakaron nagpasalamat ang pamilyang Larumbe sa tanang nitabang sa inbestigasyon aron makab-ot nila ang tinuod na hustisya sa kamatayon ni Jeslar. (Renante Socia Lada)