Iriga City- Nagpaluwas ngunian nin estriktong guidelines an IATF bicol matapos an padagos na paglobo kan kaso nin corona virus disease sa rehiyon kan bicol.
Sa memorandum na pinaluwas kan IATF na pirmado ninda DILG Regional Dir. Atty. Anthony Nuyda asin DOH Regional Dir. Ernie Vera, saindang sinadol an mga barangay na dai bara-basta mag-ako kan mga mapuling LSI asin ROF kun bakong kompleto an saindang mga resiketos arog kan medical certificate asin travel authority hali sa task force Covid shield.
Dapit sa medical bako sanang rapid test an kaipuhan na dara inbes an kaipuhan ngunian iyo na an swab test asin mandatory na an 14 dias na quarantine sa quarantine facility kan munisipyo, cuidad O kaya barangay.
Dai na tinugutan kan IATF an home quarantine huli sa nakaka-abot na report sa sainda na binabalga man sana kan mga ini an protocol kun sain iyo pa lugod an ginigikanan kan padagos na paglakop kan virus.
(Melvin Barayoga)
