Iriga City – Nangapodan si Gov. Migz Villafuerte kan Camarines Sur na ipadagos sana kan publiko an paglikay mientras na pinaghahalat an pagluwas kan bakuna kontra Covid-19.
Ini an nagin pangapudan kan Gobernador sa tahaw kan nagdadakol pang kaso kan hilang asin an Camarines Sur an may pinaka halangkaw na numero, alagad urugulyo man kaining ipinahayag na hababa naman an numero kan aktibong kaso.
Tinaw’an nin duon kan gobernador na importante sundon an pinagboboot na protocol kan DOH maski pa yaon an nagraraning kapaskuhan kun asin tradisyon na kan mga Pilipino an wala tuong handaan asin okasyon.
Saiyang sinabi na dikit na sanang panahon an sakripisyo mientras na pinaghahalat an pagluwas kan bakuna na pinaglalaoman sa inot na quarter kan 2021.
An nasabing pahayag reaksyon naman kan opisyal sa pahayag kan DOH na an Camarines Sur iyo an may pinakahalangkaw na aktibong kaso, kun sain mina abot ini nin 237 mientras 604 man an recoveries, sinundan kan Masbate na igua nin 86 na aktibong kaso asin cuidad kan Naga na igua nin 62 na active cases. (OIC Melvin Barayoga, RPN DZKI Iriga)
(Source: Provincial Office of Camarines Sur)
