Ang mga residente sa coastal village sa lungsod sa Jasaan, Misamis Oriental naalarma sa report sa gidudahan nga oil spill nga nag-agas gikan sa usa ka water vessel diha sa ilang kadagatan sa miaging semana. Matud pa ni Sabas Tagarda. Jr ang chairman sa barangay Lower Jasaan nga ang maong hitabo kaduha ka higayon nila namatikdan diin ang una, gikataho sayo niining tuiga.
Sa gibutyag ni Tagarda nga dili lamang usa mga ship operators nga naka-dock sa usa ka pribadong shipyard nga naa sa Lower Jasaan ang posibleng responsable sa maong insedente. Sa pagkakaron, ang Department of Environment and Natural Resources Management Bureau, ang local environment office ug ang Phil Coast Guard ang naghiusa pagdetermina kon kinsa ang responsible sa maong spillage. Ang gihimo sa otoridad, sumpay pa ni Tagarda nga nagkuha sila karon sa sample sa matag barko ug ila kining i-match sa miagas nga substance aron sa pagsuta kon kinsa sa mga sakyanang pandangat ang nagbuga sa itom nga liquid sa kadagatan.
Ang gidudahang oil spill miabot na sa ngadto sa lima ka hektaryang luna gikan sa baybayon diin maoy hinungdan nga nahunong ang pagpanagat sa mga mangingisda sa maong area. Naapektuhan usab ang bag-ong tinanom nga mga mangroves sa nasangpit nga dapit.
Apil sa nakadunggo sa maong shipyard mao ang tugboats, passenger vessels ug cargo ships nga nagbiyahe sa nahisgutang palibot.
Sa kabahin ni Conrado Mahinay, Jr, usa ka opisyal sa community Environment Natural Resources Office sa Misamis Oriental, siya miingon nga maayo na lang nga nabantayan gilayon ang maong oil spill nga sa ingon dili na kini makadamyos pa sa marine life sa maong dapit. (Provincial Information Office – MisOr)
