Gibutyag ni Sarangani Province Governor Steve Chiongbian Solon nga disiplina ang kinahanglan aron mabatasan ang pagtuman sa personal safety protocol para nga bisan unsa pa mang balatian nga makatakod, dili lang Coronavirus, andam pirme ang kaugalingon. Kung mahimo na nga kinaiya ang pagsuot og face mask ug face shield, pag-iwas sa panagtapok sa tao ug paghinlo sa lawas, dili na makaingon pa nga mabag-uhan sa mga gipatuman nga patakaran.
Sama sa testimonya ni Mayor Jun Sumbo, ngil-ngig ang Coronavirus. Hapit pa madisgrasya ang kinabuhi sa mayor sa lungsod sa Malapatan. Padayong nanawagan si Governor Solon nga dili magkumpyansa ang katawhang Sarangan.
Sa talaan sa Sarangani Provincial Health Office, ang active cases sa probinsya Sarangani ang niabot na sa setenta (70) ka mga tao. Nisaka ang munisipyo sa Glan anaa na sila karon sa kwarentay uno (41) ka active cases, Maasim onse (11), Alabel walo (8), Malapatan upat (4), Malungon tulo (3), Kiamba duha (2) ug Maitum usa (1). Nindot ang gipakita nga pag-ubos sa ihap sa Maasim tungod niaging mga semana anaa pa sila sa kwarenta kapin.
Lahi-lahi matud pa ang sintomas nga gagawas kung anaa sa lawas ang Coronavirus. May hilanat, ubo, sip-on, sakit sa ulo, pamuypoy sa lawas ug mga tiil, diarrhea, adunay dili makalasa sa gipangkaon. Naa gani dili na makatimaho bisan alcohol pay ipa-simhot. Angay nga magpasalamat sa Ginoo kung walay sintomas nga gibati, sila ang ginatawag nga mga asymptomatic patient.
Aprobado na sa Sangguniang Panlalawigan ang dungag pondo nga Dyes punto Singko Milyones ka pesos (₱ 10.5M) alang sa tanang lungsod sa Sarangani Province. Segun ni Board Member Joseph Calanao, ₱ 1.5 Milyon ka pesos ang bahin sa kada munisipyo subay sa nasabutan nila Governor Solon ug sa pito ka mayor alang sa nagpadayon nga pakigbatok sa COVID-19. (Provincial Information Office – Sarangani)
