Cebu City – 21 na ka lungsod sa probinsiya sa Sugbo ang wala nay aktibong kaso sa coronavirus disease.
Mao kini gipahibawo ni Dr. Christina Giango, pangu sa PHO o Provincial Health office, sa mga tigbalita.
Nagpasabot kini nga sa 44 ka lungsod, 23 na lang ang nagbaton og mga pasyente sa Covid 19.
Base sa listahan sa PHO, ang mga lungsod nga Covid free na naglakip sa Alcoy, Alcantara, Aloguinsan, Asturias, Badian, Barili, Borbon, Ginatilan, Malabuyoc, Moalboal, Oslob, Poro, Pilar, Ronda, Samboan, San Francisco, Santander, Samboan, Sibonga, Tabuelan ug Tabogon.
Gikan sa paghasi sa Covid-19 sa probinsya hangtod sa Nob. 7, nakatala ang PHO og 6,351 ka kaso.
Ug sa maong gidaghanon, 5,710 na ang naulian ug 394 ang nangamatay busa aduna na lay 247 ka aktibong kaso.
Subay niini, padayon gihapong gimonitor sa PHO ang mga lungsod ug siyudad nga adunay aktibong mga kaso.
Ang 247 ka aktibong kaso gilangkoban sa 20 sa Consolacion; 18 sa Danao City;tag-17 sa Minglanilla ug Boljoon; 16 sa Bantayan; tag-14 sa Argao ug Toledo City; 13 sa Madridejos; 12 sa Compostela; tag-11 sa San Fernando ug Tuburan; siyam sa Carcar City; tagwalo sa Liloan, Carmen, Santa Fe, Talisay ug Naga City; pito sa Balamban; unom sa San Remigio; lima sa Daanbantayan; upat sa Medellin; tagutlo sa Cordova, Catmon ug Bogo City; duha sa Dalaguete; ug tagsa sa Pinamungajan, Dumanjug, Alegria ug Tudela.
(Jhon Tadlip/JTY, photo courtesy of The Net)
(Source: Cebu Provincial Health Office)