Cebu City – Miabot na og 17,006 ang gidaghanon sa mga pasyente sa coronavirus disease o Covid 19 sa Central Visayas ang naulian.
Ang maong ihap miangkon og 86 porsyento sa 19,772 ka kinatibuk-ang kaso hangtod sa miaging adlaw.
Segun sa uwahing bulletin sa Department of Health o DOH VII, 69 ang nadugang sa mga naayo sa Covid 19 sa rehiyon ug kini gilangkoban sa 33 sa probinsya, 28 sa Cebu City ug walo sa Lapu-Lapu City.
Samtang ang total  17,006 ka recoveries gilangkoban sa 8,896 sa Cebu City; 4,143 sa Cebu province; 1,972 sa Lapu-Lapu City; 1,944 sa Mandaue City; 124 sa Bohol; 124 sa Negros Oriental; ug tulo sa Siquijor.
Una niini, gireport sa Siquijor nga ang tanang upat ka kaso sa COVID-19 nga mga LSI o locally stranded individual naayo na apan ang record sa DOH 7 nagpakita nga tulo lang ang kompirmadong kaso nga nakarekober sa impeksyon.
Sa pikas bahin, nakatala usab ang health department og 64 ka bag-ong nagpositibo sa virus sa rehiyon.
Sa maong gidaghanon, 26 sa Cebu province, 22 sa Cebu City, siyam sa  Mandaue City, duha sa Lapu-Lapu City, ug lima sa Bohol.
Nunot niini, miabot na ang tanang aktibong kaso sa Central Visayas og 1,549.
(Jhon Tadlip/ JTY)
(Source: Department of Health VII)
