Cebu City – Gisupak ni Gob. Gwendolyn Garcia ang validity ug basihan sa pasidaan nga gipatugbaw sa mga medical professionals labot sa posibleng “surge” o pagsaka og balik sa mga kaso sa coronavirus disease sa Cebu province.
Atol sa press conference gahapon, si Garcia mibarog nga bisan kon mas taas ang gidaghanon sa aktibong mga kaso sa lalawigan kon itandi sa ubang dapit sa Central Visayas, apan mius-os ang maong ihap ug mas diyotay ra kon itandi sa ubang lugar kon analisahon ang data subay sa populasyon.
Hangtod sa Setyembre 13, basi sa data Department of Health o DOH VII, ang ihap sa aktibong gi-covid sa probinsiya 583 gikan sa kapin sa 5,000 ka kinatibuk-ang kaso sukad magsugod ang outbreak niadtong Marso.
Segun usab sa maong data, 4,143 ang tanang naulian ug 327 ang patay.
Gipasupot ni Garcia ang maong pamahayag nunot sa report sa tigpamaba sa Cebu Medical Society nga nagpasidaan sa posibleng pagsulbong og balik sa mga kaso sa Covid 19 sa probinsiya kon pabiling magkompiyansa ang mga lumulupyo.
Gihulagway ni Garcia ang pamahayag sa grupo sa mga doctor nga motherhood ug insulto sa paningkamot sa mga local chief executives ug sa mga mulupyo nga nagtuman sa health protocols. (Jhon Tadlip/ JTY)
(Source: Cebu Provincial Government Public Information Office)