Sarangani Province – Upat (4) ka barangay sa lungsod sa Maasim ang mapasalamaton karon sa na-turnover na kanila nga sementadong provincial road gikan sa ubos nga bahin nga Barangay Malbang hangtud sa pinakatumoy nga upland IP barangay nga Barangay Amsipit, naka-benipisyo ang maagian nga Barangay Seven Hills ug ang Sitio Mahayahay nga sakop sa Barangay Colon.
Sa nahitabo nga inauguration ug dedication ceremony ato lang adlaw nga Lunes, Nobyembre 8, hilabihan ang kalipay sa mga lumulupyo nga may katumanan na ang ilang gipangandoy. Ang upat (4) ka oras nga ilang ginabaktas ug ginalabigar kaniadto gamit ang kabayo aron lang makaabot sa sentro nga bahin sa munisipyo sa Maasim ang nahimo na lang kini karon nga traynta (30) minutos.
Segun sa mga residente sama nila Manang Velencia Isla, Tribal Chieftain Ruben Isla ug Romeo Kadjie, nahitabo lang kini matud pa sa termino ni Governor Steve Chiongbian Solon nga wala pakyasa ang gisaad kanila nga mga nanimuyo sa kabukiran, sila nga mga myembro sa kaigsoonang lumad. Bisan si Sir Ricky Lumapas, principal sa Kyumad Integrated School, ang nihatag sa iyang personal nga testimonya nga mangatumba ug mangapaso pa sa tambutso sa motor ang mga magtutudlo gumikan sa kalisod sa dalan.
Nigasto ang gobyerno og P170-Milyones ka pesos aron masemento ang provincial road gikan Malbang paingon Amsipit, may gibutang pa nga mga box culvert ug ubang istruktura. Ug kini nga dalan ang la-hos na sa katapad nga munisipyo sa T’boli, South Cotabato.
Ang P170-Milyon ka pesos nga nagamit nga pondo ang gikan sa CMGP program sa DILG, kanhing gitawag nga KALSADA project. Ang mga contractor mao ang MJ Tiongson Construction ug JDRC Construction & Supplies. Aduna puy gitampo nga pondo ang Kapitolyo sa Sarangani ug ubang ahensya sa gobyerno maong anaa sa kapin trese kilometros (13km) ang kinatibuk-ang nasemento.
Sa maong seremonyas atong Lunes, nitambong mismo si DILG Region 12 Director Josephine Leysa kuyog sila DILG Provincial Director Engr. Samuel Camaganacan ug Municipal DILG Officer Melencio Balanag.
Gitimbaya ni Regional Director Leysa ang Provincial Government sa Sarangani sa liderato ni Governor Solon kauban sila Vice Governor Elmer De Peralta, Board Member Odoy Jamora, ang SP infra committee chairman, tanang board member, Assistant Provincial Administrator Engr. Gerald Faciol, ug ang Sarangani Provincial Engineering Office sa pagpanguna ni Provincial Engineer Jerry Belbider gumikan nahimo matud pa nga number one best implementer sa tibuok Pilipinas ang Sarangani sa CMGP program sa DILG.
Buot pasabot, nagamit og sakto sa LGU Sarangani ang pondo sa CMGP program, maayo sa kanunay ang resulta sa pagpasemento ug walay anomalya sa pag-implementa.
Gawas sa nindot nga dalan padulong sa sentro sa Amsipit, Maasim, dungan usab gi-inagurahan ang lig-on nila nga tulay, ang Kyumad Bridge, pinaagi sa contractor nga Charifer Builders. Gipondohan ang maong Kyumad Bridge sa Sulong Imprastraktura program ni Governor Solon og P36-Milyon ka pesos.
Samtang ang nindot nila nga barangay gymnasium ang gipondohan sa Kapitolyo sa Sarangani og Tres Milyones ka pesos (P3-M), ang contractor sa covered court mao ang MFN Builders.
Nalipay usab ang mga katawhan sa Barangay Amsipit tungod nagpahigayon og libre nga eye checkup ug pagpanghatag og reading glasses ang opisina ni Governor Solon, naka-benipisyo ang gatusan nga may diperensya sa mata. Ka-partner sa Serbisyong Sarangan Community Outreach Program sa Gobernador ang ilado nga Merced Optical Clinic sa Gensan gidumalahan ni Dra. Ma. Ellaine Merced.
Todo na lamang ang pagpasalamat ni Amsipit Kapitan Helario Kaka ngadto sa probinsya, apil na ang ayuda gikan nila Senador Manny ug Congressman Ruel Pacquiao. Apil niining gipasalamatan sila Mayor Zyrex Pacquiao, Vice Mayor Tessie Nambatac ug mga konsehal sa pagtutok sa ilang kalambuan.
Nakigduyog sa kalipay sa mga taga-Amsipit ang mga barangay official sa Malbang, Seven Hills ug Colon nga anaa pud nitambong. Anaa ang presensya sa kapulisan, kasundaluhan ug community volunteers sama sa grupo nga ACCERT.
(Source: Sarangani PIO | Maasim PIO)